Luna Celemín, soprano coruñesa afincada en Berlín, presenta en compañía do pianista Christian Camino esta proposta íntima que explora a evolución da canción de cámara e o lied desde a linguaxe do romanticismo tardío ata as estéticas máis exixentes da creación actual. O concerto establece un fío condutor entre a tradición alemana de Richard Strauss e a vangarda de George Crumb coa de compositores fundamentais da actualidade como José María Sánchez-Verdú e Wolfgang Rihm. Deste último, o dúo estreará en España dúas obras: 3 Hölderlin Gedichte e Ophelia Sings, mentres que do autor gaditano estrearán en Galicia a súa obra El buscador caminante. Esta será precedida e continuada por dúas das máis impactantes pezas de Strauss: Letzte Blätter e Lieder op.27.